當我哋喺度笑「安心出行」篤數嘅時候……

少於 1 mn read

冇錯,「安心出行」喺一堆你噏唔出名嘅國家上晒下載榜第一,篤數篤到出面;資訊科技辦公室聲稱有超過90%下載係香港,得佢個講字,好大機會唔係真正嘅數字嚟。

但咁係咪就等於香港人可以安心?大家留意下身邊嘅同事、朋友,長輩,可能就會發現,原來唔聲唔聲,佢哋已經裝咗,再用部裝咗「安心出行」嘅手機嚟同你 Signal緊。

可能係因為日日要去堂食、Lunchhour打晒蛇餅仲要逼喺門口填紙仔好唔方便,可能係唔想阻住人做生意…但係咁就正中政府下懷啦!多一個人貪方便安裝「安心出行」,監控危機增加咗嘅唔止係佢一個,而係所有會同佢聯絡嘅人!

條二百萬嘅數,唔係做俾本身已經好有戒心嘅黃絲睇啦,而係喺舖天蓋地嘅官媒助攻下﹙《東張西望》前幾日先喺黃金時段,講經咁話寫紙仔冇用,陰啲陰啲叫大家裝安心出行﹚,對政府有保留但又對自己資料唔太上心嘅『遊離用戶』。政府就係要營造『咁多人用,好似都冇乜嘢吖』呢一個氣氛,令呢一班用戶放低戒心。

即使只係「裝住先」,唔好忘記個 App一裝落電話,code都未掃,就可以睇晒你手機入面所有相,睇你用緊咩 App同上網嘅情況。

如果你身邊有人已經裝咗「安心出行」,記得要提醒佢,同時亦係保障緊會同佢通訊嘅你自己:為咗幾分鐘,你會唔會唔排黃店去食美心,咁點解要為幾分鐘,拱手將自己嘅手機資料送出,值得咩?

By

何桂藍,綽號「立場姐姐」,香港民主派政治家,曾於《立場新聞》任職記者。因在反送中運動直播採訪中的獨特風格及於直播元朗襲擊事件時被襲擊而聞名。

我主場,我立場