政府對被送中 12港人見死不救 先係「維護司法公義」?

少於 1 mn read

咁嘅歪理都講得出,證明政府一方喺 12人被送中一事上,根本無任何講法可以為自己開脫。

在《視點 31》對談中,不斷強調自己律師身份的謝偉俊,一再迴避 12港人至今被秘密關押超過 50日,仍未能會見律師、接收藥物、明顯被剝奪所有人權的事實,全個對談只識追問去逼鄒家成「承認有關人士係錯在先」、「畏罪潛逃係罪有應得」。

謝偉俊口口聲聲自己「希望所有人都得到公平對待」,又話自己「既然係律師就要講事實講原則講道理」,但竟然可以講出以下歪理,想為香港政府嘅惡行開脫:「任何政府都唔會接受任何人士公然咁畏罪潛逃,然後要政府攬晒佢哋上身,咁樣係違反公共利益,政府係唔應該鼓勵人畏罪潛逃,唔面對制裁逃走,之後仲要警方、政府公佈晒所有嘢,當呢班係無辜受害者、畀人老笠過去,呢個唔係任何政府應該有嘅態度,我哋要維護司法公義。」

12個公民在境外被秘密關押,音訊全無,政府沒有營救、協助的責任?為家屬提供協助就會違反公共利益、破壞司法公義?

12港人被送中以來,大家都睇得好清楚,由林鄭、李家超到謝偉俊,其實嗰種詭辯都係一脈相承,將事件嘅一切責任,推落 12港人「罪有應得」嗰度,轉移中港合謀將人送中、12港人面對秘密關押、甚至可能正遭受酷刑呢啲關鍵問題。咁鍾意一日到黑講法治嘅建制,對住呢啲公然違反人權嘅行為,就突然話「各處鄉村各處例」,將未審先囚講成天公地道。

香港政府唔止唔幫家屬,甚至配合中共將家屬耍來耍去,而家更被掦發有同中國合謀、配合將港人送中的嫌疑,除咗有呢啲咁低劣嘅手法轉移視線,根本無法自圓其說。

P.S. 不過即使無原則如謝偉俊,面對這宗黑白非常清楚的案件,也無法幫中共兜得返,唯有搬出菲律賓,泰國出嚟,印證「全世界都有冤案」之說。即係其實佢自己都知道 12港人被送中係有冤情啦。

By

何桂藍,綽號「立場姐姐」,香港民主派政治家,曾於《立場新聞》任職記者。因在反送中運動直播採訪中的獨特風格及於直播元朗襲擊事件時被襲擊而聞名。

我主場,我立場